Պատահե՞լ է, որ ապրանք գնեք որևէ հայտնի անձի խորհրդով՝ նրա «Instagram»-ի էջում կամ «Youtube»-ի ալիքում տեղադրված տեսանյութի շնորհիվ: Եթե այո, ուրեմն «ինֆլուենսեր մարքեթինգը» Ձեր դեպքում էլ է «աշխատել»: Ի՞նչ է դա. փորձենք հասկանալ…

 

Ովքե՞ր են ինֆլուենսերները

Ինֆլուենսերներն այն հանրային մարդիկ են, որոնց կարծիքը կոնկրետ լսարանի համար կարևոր է և առաջնորդող: Ինֆլուենսերի կարծիքը կարող է ազդեցություն ունենալ նաև ընկերությունների մարքեթինգային նպատակների իրականացման գործում՝ մեծացնելով ընկերության ճանաչելիությունը և նպաստել վաճառքների աճին: Ինֆլուենսերներ կարող են լինել բլոգերները, վլոգերները, փորձագետները, դերասանները, մարզիկները և այլ հայտնի մարդիկ: Նրանք իրենց հետևորդների հետ կապը հիմնականում պահում են սոցցանցերի միջոցով: Այս հանրային անձինք պատմում են տարբեր ոլորտներում վերջին միտումների, նոր ապրանքների ու ծառայությունների մասին, հրապարակում օգտակար տեղեկություններ և «վաստակում» իրենց լսարանը:

Ինֆլուենսեր մարքեթինգ (Influencer Marketing | Маркетинг влияния)` մարքեթինգի այնպիսի տեսակ է, որն օգտագործում է հանրային գործիչների կամ կարծիքի առաջնորդների հնարավորությունները՝  վաճառքի շուկան ընդլայնելու համար:
Այլ խոսքով՝ ապրանքը ուղղակիորեն վաճառել փորձելու փոխարեն Դուք վճարում կամ ոգեշնչում եք հեղինակավոր անձին, որպեսզի նա դրական կարծիք հայտնի Ձեր ապրանքանիշի մասին և խորհուրդ տա օգտվել որևէ ապրանքից կամ ծառայությունից: Ինֆլուենսեր մարքեթինգի հիմնական առանձնահատկությունն անձնավորումն է:

Ինֆլուենսեր մարքեթինգը «քայլում է» մարքեթինգի այլ ուղղությունների՝ SMM-ի և Content Marketing-ի (կոնտենտ մարքեթինգի) կողքով: SMM-ը գովազդային ուղերձներ տարածելու հիմնական գործիքներից է, իսկ բովանդակությունը պարտադիր բաղադրիչ է, որը ստեղծում եք կա՛մ Դուք, կա՛մ հեղինակավոր անձը:

 

Հակիրճ՝ Influencer մարքեթինգային արշավի փուլերի մասին.

• Ապրանքանիշի կամ արտադրանքի համար գտնում ենք հեղինակավոր անձի և ուսումնասիրում բլոգը, սոցիալական ցանցերը, կարող ենք օգտագործել նաև այդ նպատակով ստեղծված հատուկ կայքերը: Այս փուլում կարևորը ոչ թե ամենահայտնի բլոգերին ընտրելն է, այլ նրան, ով ամենամեծ ազդեցությունը կարող է ունենալ Ձեր թիրախային լսարանի վրա:
• Նախաձեռնում ենք մարքեթինգային արշավ, որի նպատակն է ներգրավել հեղինակություններին:
• Նախաձեռնում ենք երկրորդ արշավը՝ ստեղծելով ուղեցույց կարծիքի առաջնորդների համար՝ լսարանի ներգրավվածության աստիճանն առավելագույնս բարձրացնելու համար: Սահմանում ենք մեր նպատակները՝ մեծացնել վաճառքի ծավալը, սոցցանցերում բաժանորդների թիվն ավելացնել, մարդկանց դրդել փորձել ապրանքը:
• Հետևում ենք ճանաչելիության և վաճառքի ցուցանիշներին:

 

Ինչպե՞ս ընտրել համապատասխան ինֆլուենսերի

Առաջին հերթին պետք է հասկանալ՝ արտացոլո՞ւմ է նա ապրանքանիշի արժեքները: Մի պահ պատկերացրե՛ք՝ ինչ կլինի, եթե բնապահպանական ակումբի «դեմքը» լինի բնական կաշվից և մորթուց հագուստի սիրահարը:

Ուսումնասիրե՛ք ինֆլուենսերի հրապարակումները և պարզե՛ք, թե նրա էջում ինչպես կերևա ապրանքը: Ճշտե՛ք նաև՝ նմա՞ն են Ձեր ապրանքանիշի և ինֆլուենսերի լսարանները:

Հարկավոր է նաև կատարել թեկնածու ինֆլուենսերի օգտահաշվի ավտոմատացված ստուգում: Դրա համար նախատեսված ծառայություններից է «LiveDune»-ը (https://livedune.ru/): Այնտեղ առկա «Ստուգում» բաժնի միջոցով կարող եք ստանալ հետաքրքրող էջի վերլուծությունը: Անհրաժեշտ է ուշադրություն դարձնել՝

Еngagement Rate (ներգրավվածության մակարդակը) – որքան այն բարձր է, այնքան լավ: Ավելի քան 2%-ն ընդունված է համարել լավ ցուցանիշ: Կարմիր նշանը կհուշի, եթե էջը չի համապատասխանում ձեզ:

«Взаимодействия» («Փոխազդեցություններ») բաժինը ցույց կտա բաժանորդների թվի աճի կամ նվազման ընդհանուր դինամիկան ամսական կտրվածքով: Թվերը «կմատնեն» այն օգտատիրոջը, որը չի կարողանում գրավել իր լսարանին:

«Динамика набора лайков» («Հավանումների հավաքման դինամիկա») բաժինն էլ «կպատմի», թե որքան արագ են հավաքվում հրապարակումների հավանումները, և, արդյոք, դրանք իրակա՞ն են, թե՞ ոչ: Եթե շատ կտրուկ աճ է նկատվում, հավանաբար, հավանումներն իրական չեն:
Ինֆլուենսերի օգտահաշվի մասին առավել մանրամասն վերլուծական տեղեկություններ կարելի է գտնել այլ համանման ծառայությունների օգնությամբ, օրինակ՝ «Picalytics»-ի և «Minter»-ի:

 

Պարտադի՞ր է՝ ինֆլուենսերն ունենա հետևորդների մեծ բանակ

Փորձը ցույց է տալիս, որ մեծ լսարանը հաջողության գրավականը չէ: Ոչ շատ մեծ (մի քանի հազար) հետևորդ ունեցող ինֆլուենսերների հետ աշխատանքի դեպքում հաճախ կարող է լսարանի ներգրավվածության ավելի բարձր մակարդակ ապահովել, քան  հարյուրհազարավոր բաժանորդներ ունեցող բլոգերների պարագայում: Մեծ լսարանի կազմում կարող են լինել տարբեր հետաքրքրություններ ունեցող մարդիկ, և հաղորդագրությունը թիրախային չի լինի: Բացի դրանից՝ մեծ լսարան ունեցող ինֆլուենսերի հետ աշխատելու համար կպահանջվի ավելի մեծ գումար, և արդյունավետության գնահատումը պետք է նախևառաջ կատարել այդ տեսանկյունից:

 

Ինչպե՞ս դիմել ինֆլուենսերին ցանկալի արդյունքի հասնելու համար

Կարճ, բայց ճիշտ շեշտադրումներով նամակները, ամենայն հավանականությամբ, կկարդացվեն և անպատասխան չեն մնա: Բացատրե՛ք, թե ինչու եք նրան շեղում կարևոր գործերից, և ինչու նա պետք է Ձեզ ժամանակ հատկացնի: Նշե՛ք, թե ինչ է հարկավոր, խոսե՛ք հստակ և հասկանալի: Չափավոր հումորը, կենդանի շարադրանքը և խիստ պաշտոնական ոճը ևս կարևոր են: Եթե կան հղումներ կամ աշխատանքներ, որոնց պետք է ինֆլուենսերը ծանոթանա, կցե՛ք նամակին:

Ինֆլուենսերի մոտ մի՛ գնացեք, եթե ապրանքը կամ ծառայությունը դեռ պատրաստ չէ: Բացի դրանից՝ խուսափե՛ք նրան դիմելուց, եթե վերջերս նա Ձեր մրցակցի պրոդուկտն է գովազդել:

Ի՞նչ ենք մենք ուզում ինֆլուենսերից

Անհրաժեշտ է հստակ սահմանել, թե ինչ եք ակնկալում գովազդային հրապարակումից, ինչպես պետք է ինֆլուենսերը ներկայացնի այն: Ինչքան շատ մանրամասներ արձանագրվեն, այնքան լավ:

Բովանդակության վիզուալ մասի նկարագրություն

Ձեզ լուսանկա՞ր, թե՞ տեսանյութ է հարկավոր: Ինչպե՞ս և որտե՞ղ է պետք նկարահանել: Ի՞նչ պայմաններում է անհրաժեշտ նկարել: Ի՞նչ պետք է լինի կադրում: Եթե տեսանյութ է, ինֆլուենսերը պե՞տք է խոսի, թե՞ ոչ:

Բովանդակության տեքստային մասի նկարագրություն

Ի՞նչ արտահայտություններ պետք է օգտագործել նկարագրելու համար: Ի՞նչ հեշթեգներ օգտագործել: Ի՞նչ պետք է հասկանա բաժանորդը հրապարակումը  կարդալուց հետո: Ի՞նչ տեղանք է անհրաժեշտ նշել:

Ստեղծագործական կողմ

Ինֆլուենսերն ավելի լավ է ճանաչում իր թիրախային լսարանին, քան Դուք: Ցանկալի է նրան հարցնել, թե նա ինչպես է պատկերացնում Ձեր ապրանքի գովազդը: Համագործակցե՛ք նրա հետ, թո՛ւյլ տվեք նրան ստեղծագործել. դա կբարձրացնի գովազդային հրապարակման արդյունավետությունը:

Եթե ​​ցանկանում եք ստանալ չափելի արդյունք և արշավը շտկելու հնարավորություն, բովանդակությունն ինքնե՛րդ ստեղծեք կամ բլոգերին մանրամասն բացատրե՛ք, թե ինչ եք ցանկանում ստանալ: Ուրվագծե՛ք  ստեղծարարության սահմանները, հիմնական արգելքներն ու սահմանափակումները: Բացի դրանից՝ ուշադրությո՛ւն դարձրեք նրանց, ովքեր ոլորտում հաջողության են հասել. եթե լսարանը համապատասխանում է ձեր արտադրանքին, ամեն ինչ հիանալի կլինի:

Ինֆլուենս մարքեթինգի հնարավորությունների խելամիտ և ճիշտ օգտագործման պարագայում Ձեր ընկերությունն իսկապես կշահի: Այն ավելի հայտնի կդառնա, նրա մասին կխոսեն շատերը, իսկ Ձեր առաջարկած ապրանքներն ու ծառայությունները նախընտրողների թիվը կմեծանա. չէ՞ որ իրենց հեղինակավոր անձն է խորհուրդ տվել օգտվել դրանցից:

Բացի դրանից՝ գովազդային տեղատարափի պայմաններում մարդիկ չեն ցանկանում տեսնել իրենցից ժամանակ խլող ուղղակի գովազդ. նրանք նույնիսկ արդեն չեն էլ նկատում դա: Եվ քանի որ սոցիալական ցանցերում են անցկացնում օրվա մեծ մասը, այդ հարթակում արված գովազդն առավել արդյունավետ է լինում, և մեծ հավանականություն կա, որ մարդը, օգտվելով ապրանքից կամ ծառայությունից, այն խորհուրդ կտա իր շրջապատին:

Ինֆլուենսեր մարքեթինգի պահանջարկն աստիճանաբար աճում է, դրա մասին են վկայում նաև միջազգային հետազոտությունները: «Tomoson» ընկերության անցկացրած հետազոտության համաձայն էլ՝ մարքեթինգային այս գործիքի վրա ծախսված յուրաքանչյուր դոլար բերում է միջինում 6,5 դոլար: