Կորոնավիրուսի համավարակի ընթացքում աշխատանքի, խաղերի և շփման համար համացանցի օգտագործումը մարդկանց շրջանում նոր սովորություններ ձևավորեց: Հիմա, երբ շատ երկրներ սկսում են աստիճանաբար դուրս գալ կարանտինից, ժամանակն է վերանայել առաջնահերթությունները և բիզնես գործընթացները: Անհրաժեշտ է իմանալ, թե ինչպես են փոխվում սպառողների կարիքները՝ նոր պայմաններին պատրաստվելու և ճգնաժամից դուրս գալուն արագ արձագանքելու համար:
Արագացված թվային էվոլյուցիայի ազդեցությունը մարդկանց վարքի վրա
Google Trends-ի վիճակագրության համաձայն՝ մարդիկ ավելի շատ են օգտվում ծառայություններից թվային ձևաչափով. կարանտինի ընթացքում թվային ալիքները դարձան մարդկանց հետ շփվելու միակ միջոցը (իհարկե, խոսքն ընտանիքի անդամներին չի վերաբերում): Միևնույն ժամանակ, շատ արագ ի հայտ եկան տարատեսակ առցանց ծառայություններ:
Ժամանակն է մտածել, թե ինչպես բիզնեսը հարմարեցնել թվային աշխարհի նոր կարիքներին
Օնլայն գնում կատարելու սովորությունը շարունակվելու է
Կարանտին մտցնելուց հետո սպառողները սկսել են հաճախ առցանց գնումներ կատարել: Մարտի սկզբից ի վեր ամբողջ աշխարհում կրկնապատկվել է «առցանց գնումներ» և «ինչպես գնել համացանցի միջոցով» արտահայտություններով որոնումների քանակը:
Հաճախորդների կարիքների փոփոխությունը հանգեցրել է նոր սովորությունների
Առևտուրը միակ ոլորտը չէ, որը կարանտինի ժամանակահատվածում թվային տիրույթ է «տեղափոխվել»: Գնորդներն ավելի ու ավելի շատ են դիմում համացանցի օգնությանը այն բաների համար, որոնք նրանք հազվադեպ են առցանց կատարել կամ էլ երբեք չեն արել: Օրինակ՝ աճել է «առցանց դասեր», «առցանց վիկտորինա» և «առցանց պարապմունքներ» բառերով որոնումների թիվը:
Ինչպե՞ս է առցանց տիրույթին արագացված անցումն ազդելու բիզնեսի վրա
Մարդիկ թվային տեխնոլոգիաներն ավելի ու ավելի շատ են օգտագործում կյանքի բոլոր ոլորտներում, և սպառողների սպասելիքները առցանց ծառայություններից և առցանց խանութներից մեծանում են: Ահա թե ինչու բոլոր ընկերությունները, անկախ չափից, նոր կարիքները բավարարելու համար պետք է անցնեն թվային տեխնոլոգիաների և փոփոխություններ կատարեն:
Ժամանակին համընթաց քայլելու համար ընկերությունները պետք է թվային փոխակերպում սկսեն
Ըստ McKinsey-ի նոր զեկույցի՝ համավարակի պատճառով սպառողների վարքագիծը փոխվել է, և ընկերությունների մեծամասնությունը հարմարեցնում է բիզնեսի մոդելները թվայինին: Գրագետ թվային մարքեթինգը կարող է բերել մինչև 20% լրացուցիչ եկամուտ և մինչև 30% նվազեցնել ծախսերը: Սակայն ընկերությունների միայն 2%-ն է հասել թվային հասունության վերջին փուլերին. մնացածը նոր են սկսում այդ ուղին:
Հեռավար աշխատանքը դեռ երկար կշարունակվի
Ավելի լավ է թվայնացնել ներքին գործընթացները, որպեսզի հեռավար աշխատանքի ընթացքում հարմարավետությունն ու որակը չտուժեն: Բացի դրանից՝ աճում է տան համար գրասենյակային սարքավորումների և տեխնոլոգիաների պահանջարկը, օրինակ՝ տեսազանգերի համար ծրագրային ապահովման:
Skype-ից ամեն օր օգտվողների թիվը մեկ ամսում աճել է 70%-ով: Zoom-ը նախընտրում է օրական 300 միլիոն մարդ (30 անգամ ավելի, քան 4 ամիս առաջ), Google (Hangout) Meet-ը՝ 100 միլիոն: MS Teams-ի օգտատերերի թիվն էլ հունվարից աճել է 5 անգամ՝ հասնելով 75 միլիոնի:
Կա՛նգ առեք և որոշե՛ք, թե ուր գնալ
Թե՛ հաճախորդները, թե՛ աշխատակիցները ավելի ու ավելի շատ են օգտագործում թվային ալիքները աշխատանքի և փոխհարաբերությունների համար: Գործունեության բոլոր ոլորտների վերափոխումը դարձել է հաճախորդների հետ շփման և բիզնեսի արդյունավետ վարման կարևոր պայման: Ահա մի քանի առաջարկություն.
1. Հարմարվե՛ք ձեր հաճախորդների կարիքներին
Համավարակի ազդեցության տակ սպառողների վարքագիծը փոխվում է արագ և անկանխատեսելիորեն: Հատկապես կարևոր է, որ գովազդատուները հասկանան, թե ինչ են փնտրում մարդիկ, և ինչի պահանջարկը կա տարբեր ոլորտներում: Դրան համապատասխան հնարավոր կլինի փոխել առաջարկը:
2. Պատրա՛ստ եղեք արագ փոխվել
COVID-19 համաճարակի ընթացքում լսարանի հետ կապի մեջ լինելու համար շատերն արագ փոփոխեցին իրենց գովազդային արշավները, իսկ ոմանք անցում կատարեցին նոր ոլորտներ: Ճկուն լինելը և արագ արձագանքելը ոչ միայն կօգնեն ձեզ արդյունավետ գործել համավարակի ժամանակ, այլև կսովորեցնեն ապագայում գլուխ հանել ցանկացած փոփոխությունից:
3. Ուշադիր ուսումնասիրե՛ք սեփական տվյալները
Դրանք CRM-ի և այլ համակարգերի միջոցով հաճախորդներից ստացված տվյալներն են, որոնք անհրաժեշտ են թվային մարքեթինգի ոլորտում ռազմավարություն մշակելու, շուկայի նոր կանոններին հարմարվելու և զարգանալու համար: Այդ տվյալները ձեզ կօգնեն ավելի լավ հասկանալ հաճախորդներին և նրանց կարիքները:
4. Մտածե՛ք բիզնես մոդելի մասին երկարատև հեռանկարում
Փոփոխվող շուկայի պայմաններում շատ գովազդատուներ հակվում են կարճաժամկետ լուծումների՝ կախված կոնկրետ խնդիրներից, որոնք ազդում են բիզնեսի վրա: Հիմա, երբ մենք սկսել ենք շարժվել ճգնաժամից դուրս գալու ճանապարհով, ժամանակն է մտածել ռազմավարության մասին և այդ հիմքի վրա կառուցել նոր, առավել ճկուն բիզնես մոդել:
Համավարակն արագացրել է թվային ձևաչափի անցման գործընթացը, և այժմ տեխնոլոգիաները կարող են մեզ օգնել ավելի արագ դուրս գալ ճգնաժամից: Կան ընկերություններ, որոնք այնքան էլ պատրաստ չեն թվային փոխակերպման, բայց նրանք հնարավորություն ունեն փոխել իրենց աշխատանքային գործընթացները:
Փոխվելու ժամանակն արդեն եկել է:
Աղբյուրը՝
https://www.thinkwithgoogle.com/intl/en-gb/covid-accelerated-digital-adoption/