SEO (Օպտիմալացում որոնման համակարգերում) ծառայությունը զիջել է դիրքերը թվային մարքեթինգի ամենապահանջված ծառայությունների ցանկում:
Այս մասին են վկայում Clutch-ի՝ ԱՄՆ-ում անցկացված հարցումները: Հարցմանը մասնակցել է մարքեթինգի 501 մասնագետ՝ 100-ից ավել աշխատակիցներ ունեցող ընկերություններից:
Համաձայն արդյունքների՝ իրենց մարքեթինգային ռազմավարության մեջ SEO-ն օգտագործում են ընկերությունների միայն 44 % -ը:
Ըստ հարցման՝ թվային մարքեթինգի թոփ-8 ծառայություններն են՝
- Սոցմեդիա մարքեթինգ (SMM)՝ 81%
- Կայք՝ 78%
- Email marketing՝ 69%
- Մեդիագովազդ (բաններային գովազդ)՝ 55%
- Կոնտենտ մարքեթինգ՝ 53%
- Մոբայլ հավելվածներ՝ 53%
- Որոնողական մարքեթինգ (SEM)՝ 47%
- Օպտիմալացում որոնման համակարգերում (SEO)՝ 44%
Clutch-ի տվյալներով՝ ընկերություններից շատերը չեն հասկանում SEO-ի իմաստն ու կարևորությունը. սա նաև այն պատճառով, որ որոնողական համակարգերի օպտիմալացումը միանգամից տեսանելի չէ, իսկ մարքեթոլոգների գլխավոր առաջադրանքը վաճառքի ծավալների և եկամտի ավելացումն է՝ հնարավորինս կարճ ժամանակահատվածում:
Միևնույն ժամանակ՝ «կայքի այցելությունների ավելացումը» որպես նպատակ դիտարկում են հարցվածների միայն 11 %-ը:
Այս ֆոնին հետաքրքիր է նշել՝ վերջին տարիներին անցկացված մի շարք այլ հետազոտություններում SEO-ն փոքր և միջին բիզնեսի մարքեթինգային ռազմավարությունների լավագույն եռյակներում էր:
Վերջին տարիներին, սակայն, մարքեթոլոգներից շատերը սկսեցին հոռետեսորեն վերաբերվել ավանդական SEO-ին ու դրա էֆեկտիվությանը՝ հաշվի առնելով որոնման համակարգերի ալգորիթմների շարունակական կատարելագործումը և SEO-ում մանիպուլյատիվ հնարքների արդեն անարդյունավետ և ռիսկային լինելը:
Չնայած ակնհայտ նահանջին՝ միևնույն է պետք է փաստել, նոր տեխնոլոգիաների զարգացմանը զուգընթաց, SEO-ն շարունակում է իր տրանսֆորմացիան:
Կոնտենտի օպտիմալացումն առայժմ լուրջ ազդեցություն ունի որոնողական համակարգերում տեսանելիության ավելացման վրա: Եվ այսպես կլինի, քանի դեռ որոնումը կոնտենտ գտնելու և ապրանքի կամ ծառայության մասին իմանալու ամենատարածված գործիքն է: Իսկ որոնումն առավել արդյունավետ կլինի, եթե կոնտենտը համապատասխանի որոնման բովանդակությանն ու ներկայացնի մարդկանց համար անհրաժեշտ, օգտակար ու սպառիչ ինֆորմացիա:
