Ամեն հինգշաբթի ընկերության սոցցանցային էջերում նոր հրապարակում անելը դեռ չի նշանակում, որ դուք նպաստում եք բիզնեսի առաջխաղացմանը: Ո՛չ, կիրակիներն օգտատերերի հետ հարցուպատասխանին նվիրելը նույնպես խնդրի լուծում չէ: 🙂

Մի առիթով արդեն հասցրել ենք քննարկել գրագետ SMM-ի 12 թշնամիներին ու հուշել՝ ինչպես պետք չէ վարվել, երբ դուք վարում եք բիզնես և ցանկանում եք առաջխաղացնել ձեր էջը սոցիալական ցանցերում:

Իսկ հիմա այն մասին, թե ինչ է պետք սոցցանցերում բիզնեսի առաջխաղացման և  հիշվող ու եկամտաբեր SMM-ի համար:

Գաղտնիք չէ, որ կոնտենտը պետք է ուշադրություն ու նոր հաճախորդներ գրավի, փոխանցի հետաքրքիր ինֆորմացիա, պիտի տեղեկացնի գնորդին ու ինչու ոչ՝ նաև զվարճացնի:

Արդյունավետ SMM-ը խնդիրներ է լուծում: Ահա թե ինչպիսի խնդիրներ.

• Ընկերության իմիջի բարձրացում
• Հաճախորդների խնդիրների վերհանում
• Ոլորտում էքսպերտի կարգավիճակի ձևավորում
• Լսարանի ներգրավվածություն
• Առարկությունների հաղթահարում
• Վաճառք

Վերոնշյալ խնդիրների լուծման նպատակով հրապարակումները (պոստերը) խմբավորել ենք ըստ իրենց տեսակների/բնույթի.

• Ինֆորմացնող
• Ռեպուտացիոն
• Ժամանցային, հումորային
• Կոմունիկատիվ
• Վաճառող

Հրապարակումների պլանը կազմելիս այս հինգ տիպերի մասին հիշելը կարող է ձեր բիզնեսը բարձրացնել պոտենցիալ հաճախորդի աչքում՝ նպաստելով դիտումների և հետաքրքրվածության աճին, փոխանցվող ինֆորմացիայի բազմազանության ապահովմանը:

ԻՆՖՈՐՄԱՑՆՈՂ ՀՐԱՊԱՐԱԿՈՒՄՆԵՐ

1. Նկարագրե՛ք ապրանքը կամ ծառայությունը

Պատմեք ընթերցողին, թե որն է ձեր պրոդուկտի առանձնահատկությունը, ինչ խնդիրներ է այն լուծում և ինչո՞վ է այն տարբերվում մրցակից համարվող այլ պրոդուկտներից: 

2. Պատմե՛ք պրոդուկտի պատրաստման պրոցեսի մասին

Ձեր բիզնեսը վստահելի կլինի, եթե առաջարկները ներկայացվեն պարզ ու հասկանալի տեքստով և տեսքով: Կարելի է պատմել, թե ինչպես է ստեղծվում ձեր ընկերության արտադրած կոշիկը կամ ինչպես է պատրաստվում ձեր ռեստորանի լավագույն ուտեստը: Ընդ որում՝ պատմել կարող եք՝ ցանկացած տիպի կոնտենտով՝ տեքստ, տեքստով ուղեկցվող վիդեո, լուսանկար կամ թեկուզ անիմացիոն գիֆ:

3. Հրապարակեք օգտակար ինֆորմացիա

Ուղղորդող, ինֆորմացնող, օգտակար հղումներ և գործիքներ տրամադրող բիզնես էջերն իրոք դառնում են օրինակելի և այցելվող: Ենթադրենք՝ ունեք օտար լեզուների ուսուցման կենտրոն: Այս դեպքում պետք է ցույց տալ, թե որքան պրոֆեսիոնալ են ձեր մասնագետներն ու ինֆորմացված՝ իրենց ոլորտում: Սկսնակների համար կարճ վիդեոդասերը, որևէ թեմայի վերաբերյալ ուսուցողական կամ օգտակար հրապարակումները դրական իմիջ կձևավորեն պոտենցիալ լսարանի մոտ և կհիշեցնեն ձեր մասին այն ժամանակ, երբ, ասենք, օտար լեզուներ սովորելու ցանկություն կառաջանա օգտատերերի մոտ:

 

4. Կիսվեք նորություններով

Ցանկացած ոլորտում և բիզնես գործունեության յուրաքանչյուր հարթակում ձեզ պետք է սեփական գործի մասին շատ բան իմանալ և մի քանի անգամ ավելի լավ կլինի, եթե նորությունների մասին առաջինը խոսեք այդ մասին ձեր վեբինարում կամ գրեք ընկերության բլոգում ու ֆեյսբուքյան էջում:

5. «Ռեյտինգային ցուցակներ» կազմեք

Բիզնեսմենները սիրում են շահույթ՝ արտահայտված թվերով, իսկ ընթերցողները թվային միջավայրում նախընտրում են կոնկրետ ինֆորմացիա: SMM-շիկին մնում է համատեղել բիզնեսի շահերն ու լսարանին ներգրավելու տարբերակները, «չարաշահել» ոլորտում էքսպետի դիրքը՝ բարելավելու համար նույն դիրքը՝ նույն ոլորոտում: «Ռեյտինգային ցուցակներ» կազմելն ու ինֆորմացիան այդ տարբերակով ներկայացնելով կարելի է ավելի շատ դիտում կամ այցելություններ հավաքել:

«10 օգտակար գործիք՝ թվային մարքեթինգի արդյունավետությունը բարձրացնելու համար», «25 կայք՝ անգլերենով ֆիլմեր դիտելու համար», «12 երկիր, որտեղ արժե անցկացնել Նոր տարին». այս և նմանատիպ վերնագրերում ոչ ոք չի ակնարկում, որ աշխարհում չկան այլ գործիքներ, կայքեր կամ երկրներ, սրանք ցույց են տալիս, որ դուք ուսումնասիրել եք, ընտրել, մշակել և ներկայացնում հարյուրավոր կամ հազարավոր տարբերակներից միայն այսքանը:

Հայաստանում Forbes կարդացողներին հարյուրներով չես հաշվի, բայց ամսագիրի հրապարակած, ասենք, 100 ամենաազդեցիկ կամ հարուստ մարդկանց ցանկերի մասին ինֆորմացիա տեսնելիս քչերս ենք անտարբեր անցնում: Փաթեթավորեք ինֆորմացիան ընթերցողի աչքին հաճելի ու «հաշվելի» տարբերակով:

6. Հետազոտության արդյունքներ հրապարակեք

Հետազոտություններն արդեն վաղուց չեն ասոցացվում բրիտանացի գիտնականների հետ, ավելին՝ դրանք լրացուցիչ ինֆորմացիայի օգտակար աղբյուր են: Ենթադրենք՝ Առողջապահության համաշխարհային կազմակերպության տվյալներով՝ կաթնամթերքի ամենօրյա օգտագործումը կարող է նվազեցնել կոտրվածքներ ստանալու հավանականությունը: Եթե դուք ղեկավարում եք կաթնամթերքի արտադրամաս կամ այդ արտադրամասի ֆեյսբուքյան էջը, ապա այս ինֆորմացիան ընդունեք որպես նվեր և օգտագործեք ամենայն ուրախությամբ: Այսպիսի նորությունները նախ ցույց կտան, որ դուք հետևում եք ձեր ոլորտի անցուդարձին, իսկ դա արդեն պրոֆեսիոնալիզմի նշան է:

ՌԵՊՈՒՏԱՑԻՈՆ ՀՐԱՊԱՐԱԿՈՒՄՆԵՐ

7. Թույլ տվեք՝ իմանանք ձեր բիզնեսի մասին

Ձեր բրենդի հաղթանակների, հաճախորդներից ստացած դրական կարծքիների, պրոդուկտների հաղթարշավների մասին եղած ողջ ինֆորմացիան համեստորեն փակի տակ պահելն ամենամեծ սխալերից է, որ կարող եք անել ամեն օր Facebook-ում բարի լույս ու  բարի գիշեր ասելուց հետո:

Բիզնեսի կորպորատիվ սոցիալական պատասխանատվության կոնտեքստում կամ դրանից դուրս արված գործողությունների լուսաբանումն ու ներկայացումը ևս անհամեստություն համարել պետք չէ: Կիսվեք ձեր բրենդի հաղթանակներով, պատմեք նվաճումների մասին և խոսեք արած գործից՝ ճիշտ շեշտադրմամբ ու «մարդամոտ» տեքստով:

 8. Քեյսը՝ որպես օրինակ

Պատմե՛ք հաճախորդի ունեցած խնդրի մասին և ներկայացրեք, թե ինչպես դուք լուծեցիք այն: Սա կոգևորի նմանատիպ հարցեր կամ խնդիրներ ունեցող հաճախորդներին և կօգնի ձեզ՝ ոլոտում էքսպերտի կարգավիճակ ունենալու գործում:

9. Իսկ հիմա ներկայացնում են հաճախորդները

Սոցմեդիա մարքեթինգում դրական իմիջի մասին կարող են պատմել հաճախորդների  կամ այցելուների թողած մեկնաբանությունները, վաճառքների ընդհանուր ցուցանիշների հետազոտությունը, կարծիքի առաջնորդների կամ հայտնի դեմքերի կողմից հավանության արժանանալը և ոչ միայն:
Արեք ամեն ինչ, որ ձեր բիզնեսը ճանաչելի ու սիրված լինի մարդկանց կողմից, ապա պատմեք կամ ցույց տվեք, թե որքան ճանաչելի ու սիրված է այն:)

ԺԱՄԱՆՑԱՅԻՆ, ՀՈՒՄՈՐԱՅԻՆ ՀՐԱՊԱՐԱԿՈՒՄՆԵՐ

10. Մեմեր և հումորային գրառումներ

Ինչ-ինչ, բայց ծիծաղել սիրում են բոլորը:

11. Պատմություն

Ոչինչ այնպես չի մտերմացնում մարդկանց, որքան իրար ինչ-որ բաներ պատմելը, մտքերով կիսվելը կամ պարզապես իրար հետ խոսելը: Խոսե՛ք ձեր հետևողների ու ձեր բիզնեսով հետաքրքրվողների հետ: Պատմություն ունեցեք,  պատմեք և արեք դա յուրօրինակ տարբերակով:

12. Ցիտատներ, սրամիտ խոսքեր կամ հումոր

Երբեմն շատ բան պատմել պետք չէ, պետք է պարզապես ճիշտ ժամանակին, հարմար միտք գտնել՝ տեքստով կամ նկարով: Դա կարող է լինել նաև տվյալ պահին ցանցում ակտուալ թեմայի հումորային մեկնաբանություն՝ համապատասխան վիզուալիզացիայով:

13. Աշխատակիցների լուսանկարներ, աշխատանքային մթնոլորտի ներկայացում

Մարդիկ սիրում են ոչ միայն պատմություններ, այլ նաև սիրում են տեսնել այն մարդկանց, ում շուրջ հյուսվում են դրանք, ում միջոցով երկարում է ձեր բիզնեսի կյանքը: Աշխատանքային մթնոլորտի մասին հրապարակումները, աշխատակիցների հաջողությունների մասին պատմություններն իրոք կարող են հետաքրքիր լինել՝ մանավանդ, երբ լավ են ներկայացվում:

14. Պրովոկացիա, այո՛ հնարավոր է, բայց զգույշ. նաև վտանգավոր է

Պրովոկացիոն մարքեթինգը տարբեր դրսևորումներ կարող է ունենալ՝ մրցակից բրենդի դեմ ուղիղ արշավից մինչև սեփական բրենդի այս կամ այն թերություն կամ թերացում՝ այլ քողի տակ ներկայացնել: Ընդհանրապես, ժամանցային հրապարակում+պրովոկացիա բանաձևը երբեք մեծ հաջողություն չի խոստանում, եթե իհարկե վարպետի ձեռքի գործ չէ:

Նմանատիպ հրապարակում անելիս արժե հիշել, որ  միշտ գտնվելու են մարդիկ, ովքեր այն ծայրաստիճան անհաջող են համարելու, լինելու են մարդիկ, ովքեր պարզապես հիացած կմնան և կա մրցակից, ով, հնարավոր է, ավելի սրամիտ է: Հիմա ինքներդ որոշեք՝ որ խմբին`ինչ զգացողություններ պարգևել:)

ԿՈՄՈՒՆԻԿԱՏԻՎ ՀՐԱՊԱՐԱԿՈՒՄՆԵՐ

15. Խոսեք հաճախորդների հետ և հաշվի առեք նրանց արձագանքը

Հաճախորդների հետ շփումը, պրոդուկտի ավելի հաջող տարբերակներ ստեղծելու համար հարցումների անցկացումը և ընդհանրապես՝ շփման /հիմնավորված/ փորձերը կօգնեն երկխոսության մեջ մտնել լսարանի հետ՝ հասկանալով նրանց պահանջներն ու ցանկությունները:  Հաճախ, ամենալավ մարքեթոլոգները հենց ձեր հաճախորդներն են, որոնք ճիշտ ժամանակին ձեզ կհուշեն հաջորդ արդյունավետ քայլի մասին: Բացի այդ, մարդիկ սիրում են, երբ իրենց իրենց կարծիքը կարևոր են համարում:

Facebook-ում կամ մեկ այլ հարթակում տեղադրված հարցումները կարող են օգտատերերի լայն շրջանակի հետաքրքրել, նրանց մի մասն անպայման քննարկման մեջ կմտնի, իսկ որոշները կկիսվեն ու կարծիք կարտահայտեն:
Պատկերացրե՛ք՝ հագուստի ապրանքանիշն իր աշուն-ձմեռ հավաքածուից երեք զգեստի գունային ընտրությունը «թողնում է» ինսթագրամի հետևողներին: Այ, սա «երկար զրույցի» թեմա է՝ մեկնաբանությունների դաշտում:

16. Մրցույթներ, խաղարկություններ և նվերներ

Մի առանձին ու ոգևորող միջոց են նաև տարատեսակ մրցույթները, դրանք գրավում են հաճախորդին և ներգրավվում՝ երբեմն նաև իրենց կամքից անկախ: Որքան հետաքրքիր ու տարբերվող է ձեր առաջարկը, այնքան ավելի շատ են դրա շուրջ պտտվելու կամ հիշելու ու խոսելու այդ մասին : 

ՎԱՃԱՌՈՂ ՀՐԱՊԱՐԱԿՈՒՄՆԵՐ

SMM-ում կարևոր է ներգրավվածության ապահովվումը, իսկ ներգրավվել բոլորին ու միանգամից, անհնար է: Ուրեմն՝ թիրախավորիր և վաճառիր:
Մտածեք զեղչեր, ակցիաներ, հատուկ առաջարկներ, որոնք ունեն հստակ ժամկետներ և  պարունակում են կոնկրետ առաջարկներ: Օրինակ՝

Ուշադրություն, հայրիկներ: Գնե՛ք մանկական մեկ վերարկու և առկա տեսականուց ցանկացած գլխարկ ստացեք նվեր:

Ձեր հատուկ առաջարկը կարող է նաև տարբերվել զեղչերի կամ նվերների մասին սովորական հրապարակումներից:

17. Մի խոսքով՝ ներկայացրեք և վաճառեք

Նշեք ապրանքի որակական հատկանիշները, արժեքը, տվեք զեղչերի մասին ինֆորմացիա ու դրդե՛ք գնումների: Հենց այսպիսին են լինում վաճառող տեքստերը:

Իհարկե, մեծ հաշվով, սոցմեդիա մարքեթինգի ողջ ընթացքն է վաճառքին ուղղված քայլերի հերթականություն, որի նպատակը ճանաչելիության և ներգրավվածության աճն է, ու դրանից բխող վաճառքները: Տարբերելու համար՝ բուն վաճառող հրապարակումներն ավելի շատ դրդում են գործողության, մյուսները՝ հող նախապատրաստում այդ գործողության համար: