Թեև կորոնավիրուսի համավարակի ազդեցությունը դեռ նկատելիորեն մեծ է, սակայն շուտով կարող է սկսվել վերականգնման երկարատև գործընթացը: Տնտեսական ներկա իրավիճակը ավելի լավ պատկերացնելու և հնարավոր դժվարությունները գնահատելու հարցում կազմակերպություններին օգնելու նպատակով 4 բիզնես-առաջնորդներ պատմել են, թե ինչ սպասել սպառողներից և ինչ ռազմավարություններ ընտրել ընկերությունների աշխատանքի վերսկսման համար:
Սպառողները նախընտրում են առավել մատչելի ապրանքներ և ծառայություններ
Դենիել Թորնլի DT-Global Business Consulting-ի նախագահ
Ճգնաժամի հետևանքով ձևավորված միտումներից է համեմատաբար մատչելի ապրանքների և ծառայությունների պահանջարկը: Մոտ ապագայում սպառողներն ավելի զգուշավոր կլինեն ծախսելիս՝ հատկապես հաշվի առնելով այն հանգամանքը, որ 2021 թվականին աշխատանքի տեղավորման հնարավորությունը հազիվ թե լինի այնքան, որքան նախաճգնաժամային շրջանում: Դա նշանակում է, որ ընկերությունները պետք է գովազդային ակցիաներ անցկացնեն, չխուսափեն նորարարություններից և առաջարկեն հարմար գնով «բավական լավ» որակի ապրանքներ:
2021-2022թթ., ամենայն հավանականությամբ, կշարունակվեն սահմանափակումները միջազգային զբոսաշրջության համար, ուստի շատերը կշրջագայեն երկրի ներսում և կծախսեն ավելի շատ գումար տեղական ապրանքների և ծառայությունների համար: Մի՛ մոռացեք, որ մատչելիությունն այստեղ ևս հաճախորդներին գրավելու հարցում մեծ դեր կխաղա:
Փոփոխությունների ժամանակաշրջանը դիտարկե՛ք որպես ռազմավարական կարևոր փուլ
Քեվին Գասքել ITS Technology Group-ի նախագահ, ներդրող
Ես շատ ընկերությունների օգնել եմ հաղթահարել դժվարությունները և հավատում եմ, որ հենց ճգնաժամը կարող է դառնալ բիզնեսի համար վճռորոշ պահ, երբ ղեկավարները քննադատորեն դիտարկում են կազմակերպությանը և մրցակիցներից արագ փոխում են ապրանքները կամ ծառայությունները: Դրա համար ինքներդ ձեզ հարցրե՛ք՝ համապատասխանո՞ւմ է ձեր արտադրանքը նոր պայմաններին, փոխվե՞լ է ձեր լսարանը, եթե այո, ապա ինչ ակնկալիքներ ունի:
Երբ ես ընկերության ղեկավար էի, տնտեսական ճգնաժամից հետո հաճախորդները հասկացրին, որ իրենց համար արդեն առաջնահերթը որակն է, ոչ թե գինը: Դրան ի պատասխան՝ մենք արտադրական գործընթացում փոփոխություններ կատարեցինք, նվազեցրինք խոտանները և ամբողջությամբ թարմացրինք նյութերն ու փաստաթղթերը: Մենք նաև գովազդներում շեշտը դրեցինք որակի վրա և կատարելագործեցինք հաճախորդների հետ փոխհարաբերությունները: Դժվար պահերին ընկերության համար կարևոր է հստակ տեսնել հաջողության ուղին, իսկ դրա համար անհրաժեշտ է տալ ճիշտ հարցեր և վերանայել բիզնեսը բոլոր տեսանկյուններից:
Ընկերությունները պետք է բիզնեսի անընդհատության պլաններ մշակեն
Մարգա Հոք The Trillion Dollar Shift-ի և New Economy Business-ի հեղինակ
Համավարակը ցույց տվեց, որ կազմակերպությունները պետք է մշակեն բիզնեսի անընդհատության պլաններ, որոնք նրանց կօգնեն հաղթահարել ճգնաժամային փուլը: Պլանները պետք է ներառեն ռիսկերի գնահատումը և նվազեցումը, ինչպես նաև հակաճգնաժամային որոշումների իրականացումն ու փորձարկումը: Այդպիսի պլանի եզրափակիչ տարրը կարող է լինել բիզնեսի պիտանիության վերլուծությունն ու նկարագրությունը: Այն սահմանում է, թե ընկերության ո՛ր բաժինները պետք է շարունակեն աշխատանքը, որպեսզի պլանը լինի արդյունավետ: Կարո՞ղ են Ձեր ՏՏ համակարգերը գլուխ հանել: Ապահովագրական պայմանագիրը բոլոր անհրաժեշտ դեպքերում փակո՞ւմ է ծախսերը և այլն:
Ձեր հաճախորդներին ավելի լավ ճանաչե՛ք
Ռիտա Քլիֆթոն Interbrand-ի նախկին ղեկավար
Պահանջարկ ստեղծելու համար անհրաժեշտ է նախևառաջ հասկանալ հաճախորդներին: Ի՞նչ են մարդիկ գնում կամ ի՞նչ են ցանկանում հաճախ տեսնել: Ի՞նչն է նրանց վարքում փոխվում իրենց ցանկությամբ կամ անհրաժեշտությունից դրդված: Այս ամենը ի մի բերելով՝ կազմակերպությունը կարող է հասկանալ, թե ինչպես է իր ապրանքանիշն ընկալվում տարբեր հաճախորդների շրջանում և շուկայում առհասարակ: Այնուհետև անհրաժեշտ է որոշել, թե ինչպես կարող է ընկերությունը բավարարել գնորդների նոր պահանջմունքները, և ինչ է անհրաժեշտ փոխել:
Կարևոր է նաև, որ կազմակերպությունները գտնեն լրացուցիչ հնարավորություններ, այսինքն՝ այլ ոլորտներ, որտեղից կարող են լսարան գտնել և շահել նրա վստահությունը: Փորձարկումներ արե՛ք նոր շուկաների, նոր գովազդային հաղորդագրությունների հետ և հետևե՛ք, թե դա ինչի կբերի: Համաշխարհային հաջողված ընկերություններին բնորոշ է նորը փորձելու պատրաստակամությունը՝ հասկանալու համար՝ այն աշխատո՞ւմ է, թե՞ ոչ: Դա լավ մոտեցում է:
Աղբյուրը՝
https://www.thinkwithgoogle.com/intl/en-154/insights-inspiration/industry-perspectives/how-are-global-leaders-preparing-what-consumers-want-next/