Կա՞ն չէ հին ու մոռացված ֆեյսբուքյան էջեր, որտեղ վերջին հրապարակումն արվել է 2015-ին: Հետո էլ ոչ ոք և ոչինչ չի խանգարել այդ բիզնեսի ֆեյսբուքյան էջի անդորրը, և ոչ ոք չի մտածել SMM-ի մասին առհասարակ:
«Քնած գեղեցկուհուն» արթնացնել ցանկացող SMM-շիկը պետք է պատրաստված լինի ու փորձի հասկանալ, թե ինչու չի հաջողել նախորդը և ինչ է պետք անել՝ մինչև արդյունավետ SMM անելը:

1.Պետք է պատրաստվել և գնահատել հնարավորությունները

Նախապատրաստական փուլը լավ հնարավորություն է նպատակների և առաջադրանքների հստակեցման, արդյունքների նախանշման համար: Այս փուլում է հենց պարզ դառնում՝ պետք են ձեզ կոնտենտ մենեջեր, դիզայներ, լուսանկարիչ, քանի լեզվով են լինելու հրապարակումները, որքան է ծախսվելու թիրախային գովազդի վրա և նմանատիպ հազար ու մի հարց:
Եթե պատրաստության փուլում հասկանում եք, որ ձեր չափանիշները չեն համապատասխանում սոցցանցերին, դուք չունեք ռեսուրսներ կամ նյութ որակյալ աշխատանքի համար, ապա դուք գործը չսկսելով կխնայեք գումար, ժամանակ և նյարդեր: Ձեր ընկերության կամ բրենդի պատմության մեջ սոցցանցային «հանգած» էջեր թողնելու կամ այդ էջերը ջնջելու ոչ այնքան եկամտաբեր գործը կարելի է նույնիսկ չնախաձեռնել՝ հենց հնարավորությունները գնահատելու շնորհիվ: Դուք չեք հասցնի գրանցել վատ արդյունք, չեք կորցնի գումար և ձեռք չեք բերի, ասենք օրինակ՝ նամակներին չպատախանող ընկերության համբավ:
Բացի այդ՝ կարող եք նախ հասկանալ, թե ինչպես եք պատրաստվում ղեկավարել և նյութականացնել սոցցանցերի հետ աշխատանքը ու այս ճանապարհին… կարդացեք հաջորդ ենթավերնագիրը:

 2. Իսկ ձեզ ընդհանրապես պե՞տք է SMM

Հասկանալու համար ունիվերսալ տարբերակներ են առաջարկվում`

ա) Տեղադրեք կոնտեքստային գովազդ Google-ում ու հետևեք արդյունքներին:

բ) Տեղադրեք թիրախավորված գովազդ Facebook-ում ու հետևեք արդյունքներին:

Եթե թիրախավորված գովազդի արդյունքներն ավելի լավն են, զբաղվեք SMM-ով:
Եթե կոնտեքստային գովազդն է լավ աշխատել, աշխատեք որոնողական առաջխաղացման ուղղությամբ և հետո մտածեք SMM-ի մասին:

smm dimark

Դե, իսկ եթե երկու տարբերակներն էլ լավ արդյունքներ են գրանցել, ապա բնականաբար երկուսի ուղղությամբ էլ շարունակեք աշխատել:
Կոնտեքստային գովազդը «տաք թրաֆիքի» հետ աշխատանք է, այսինքն դուք առաջարկում եք ձեր ապրանքը մարդու, ում արդեն այն պետք է, ով արդեն Google-ով այդ ապրանքը որոնում է: Թիրախավորված գովազդում «սառը թրաֆիք» է, դուք ինքներդ եք որոշում, որ այդ մարդուն կարող է հետաքրքրել ձեր ապրանքը: Այս դեպքում, եթե հիպոթեզն աշխատեց, կաշխատեք նաև դուք, եթե ոչ՝ դուք վճարեցիք՝ իմանալու համար, որ սա լավագույն տարբերակը չէր:

3. Լավ, իսկ ո՞ւմ դիմել

Բիզնեսը սոցցանցերում ներկայացնելը պետք է կոնկրետ նպատակ հետապնդի՝ վաճառքի աճ, ներգրավվածության ապահովում, սեփական բրենդի շուրջ «համայնքի» ստեղծում, թեկուզ՝ հրապարակումներ միայն իմիջի համար, բայց անպայման՝ կոնկրետ նպատակ՝ հստակ քաղաքականությամբ:
Իհարկե կան բիզնեսներ և ընկերություններ, որոնք դժվար են «տեղավորվում» սոցմեդիա մարքեթինգի մեջ: Նման ոլորտներում պրակտիկորեն անհնար է արագ արդյունք ապահովելը, բայց եթե պատրաստ եք հենց առաջին ամսում չխոսել աստղաբաշխական եկամուտների մասին, ապա ձեզ մնում է հասկանալ՝ ով կամ ովքեր են զբաղվելու ձեր SMM-ով:
Սեփական ուժերով իհարկե հնարավոր է, բայց դուք այդպես ձեռնարկատիրոջից վերածվելու եք օնլայն մարքեթինգի մասնագետի կամ SMM-շիկի: Կարող եք ընտրել՝

ֆրիլանսերների տարբերակը,
ինտերնետ մարքեթինգով զբաղվող կազմակերպության տարբերակը:

Ֆրիլանսերների ծառայություններից օգտվելու դեպքում ձեր խնդիրը փոքր ինչ կհեշտանա: Բայց անհրաժեշտ է ընտրել փորձառու ֆրիլանսերների՝ հակառակ դեպքում՝ էջն էլ, եղած-չեղած վարկանիշն էլ կկորցնեք: Իսկ որքան փորձառու է ֆրիլանսերը, այնքան բարձր է նրա ծառայությունների գինը (երբեմն համարյա այնքան, որքան մարքեթինգային կազմակերպությունը կպահանջեր):

Ինտերնետ մարքեթինգով զբաղվող կազմակերպությունների դիմելու դեպքում դուք, իհարկե, մի փոքր ավելի շատ եք վճարում, քանի որ օգտվում եք մի քանի մասնագետի ծառայություններից: Այս դեպքում ձեր ընկերության էջի առաջխաղացման համար աշխատում է մի ամբողջ թիմ՝ մարքեթոլոգ, կոնտենտ-ստրատեգ, կոնտենտ մշակող, դիզայներ, գովազդի թիրախավորման մասնագետ:

4. Օկ, սկսում ենք մեր SMM-ը՝ ուղղված դեպի ցանկալի արդյունք

Մի՛ շտապեք: Սոցմեդիա մարքեթինգի ողջ իմաստը բիզնեսը հաջող դիրքավորելն ու ներկայացնելն է: Ոչ մի իսկական մասնագետ հենց վաղվանից չի սկսելու հրապարակումներ անել ձեր բիզնեսի էջում և չի բերելու վաճառքներ պայմանագրի ստորագրման հաջորդ օրվանից: Դրա համար մեզ ժամանակ է պետք:
Շատ կարևոր է այս փուլում ուսումնասիրել մրցակիցներին:
Մինչև սեփական ստրատեգիան գծելը նախ տեսեք՝ ինչպես են մոտենում հարցին մրցակիցները, ինչ են անում նրանք և ինչպիսի արդյունք է բերում դա:

Կարող եք սկսել կոնտենտ վերլուծությունից ու հասնել հաճախորդներին: Տեսեք, թե որքանով են կրեատիվ կամ ինչ միջոց ու ջանք են ներդնում գովազդային փոսթերի համար, ինչ սկզբունքով է գրվում տեքստը և ովքեր են հիմնական աուդիտորիան:
Այսպես դուք ոչ միայն կհասկանաք՝ ով ինչ է անում, այլ նաև՝ թե ով ինչ չի անում:
Մենք, օրինակ, վերջերս առիթ ունեցանք հետևել մանկական կոշիկների վաճառքով զբաղվող ապրանքանիշների SMM քաղաքականությանը՝ արձանագրելով՝ Հայաստանում մանկական կոշիկների խանութները քայլում են ոչ այնքան լուսավոր և պայծառ ճանապարհներով. տեքստերն առավելապես՝ տխուր, էջերում չկան կամ քիչ կան լուսավոր ու պայծառ լուսանկարներ, ակնհայտ է, որ հաճախորդն ավելի շուտ կոշիկ կգնի այդ խանութներից, եթե տեսած չլինի ֆեյսբուքյան կամ ինսթագրամյան էջերը:

smm

5. Աշխատանք՝ ստրատեգիկ առաջխաղացման համար

Մրցակիցներին ուսումնասիրելուց հետո պակաս կարևոր չէ սեփական նպատակների մասին մտածելը:
Դիրքավորման փուլում կարևոր է հասկանալ՝ ով ենք մենք հետևողների համար, ինչու նրանք պետք է մեզ բաժանորդագրվեն և ինչու պետք է կարդան մեր կոնտենտը, կամ ասենք՝ ինչպես ենք մեզ պահելու ու ինչ ենք անելու, երբ աուդիտորիան դժգոհ եղավ: Բիզնեսի հետ աշխատող անհատին կամ ընկերությանն անհրաժեշտ է նաև հաճախորդների պահանջները հասկանալը:

Դիրքավորման կարևոր առաջադրանքներից է նաև գովազդային ռազմավարության խնդրի լուծումը՝ առաջխաղացման գումարային բյուջեների տարբերակների քննարկումը:
Դիրքավորվելուց հետո անհրաժեշտ է հասկանալ, թե ինչպես եք խոսելու ձեր լսարանի հետ: Մարքեթինգային նպատակների իրականացման համար կարևոր է կոնտենտի պատրաստման և տարածման սկզբունքները: Կոնտենտը գրվում է մարքեթինգային նպատակների համար: Կոնտենտ ստրատեգիան՝ այդ նպատակներին ավելի շուտ ու թիրախավորված հասնելու համար:

6,5. Կոնտենտի հետ աշխատանքում մեծագույն սխալներից մեկն առանց թիրախներն ու պահանջները հստակեցնելու տեքստերի հետ աշխատելն է:

SMM-ն սկսելուց առաջ կարևոր է բրենդի մասին հնարավոր ամեն ինչ իմանալը. ինֆորմացիայի մեծ պաշարները ոչ ոքի չեն խանգարել, բայց այ բացակայությունը կարող է ազդել ձեր պրոդուկտիվ աշխատանքի վրա: Համագործակցության սկզբում հմուտ մասնագետը, հնարավոր է, նույնիսկ ազդի պատվիրատուի նյարդերին 🙂 Նա անընդհատ հարցեր է տալու, կոնտենտի համար ինֆորմացիա է հավաքելու ու խմբագրելու և խնդրելու է հաստատել առաջիկա մեկ ամսվա կոնտենտ պլանը: Իսկ իրականում նման աշխատանքը հնարավորություն կտա խորությամբ ծանոթանալ ապրանքանիշի առաջարկներին և լավ պատկերացնել բիզնեսի նպատակները:

Այս մասին առավել մանրամասն մենք գրել ենք կոնտենտ ռազմավարության մասին մեր հոդվածում:
Ստրատեգիան հասկանալուց, ռազմավարությունն ու պլանը կազմելուց հետո դուք հանկարծակի նկատում եք, որ անցավ 15-20 օր: Սա նորմալ է. չէ որ դուք ուղերձներ եք մշակում ու թիրախավորում այնպես, որ ընկերությունը հասնի նախանշած արդյունքներին, իսկ հաճախորդները հետադարձ կապ ապահովեն:

Ի դեպ, հրապարակումների համար նյութեր պատրաստելն այս ու ձեր հետագա աշխատանքի, եկեք չափազանցություն չհամարենք, ամենակարևոր փուլն է. պրոյեկտին լավություն անելու համար՝ սկզբական շրջանում վերցրեք այնքան ինֆորմացիա, որ ազատորեն տիրապետեք ոլորտի սկզբունքային խնդիրներին ու հարցերին: Եվ հիշեք՝ ձեր ապահոված հաղորդակցությունից է կախված ապրանք-գնորդ հարաբերությունների բարգավաճումը:
Կոնտենտը կա, նկարներ կան, առաջիկա հրապարակումների թեմաները պատրաստ են, մի խոսքով՝ SMM-ի համար կա այն, ինչ պետք է: Այ հիմա պետք է գնալ բիզնեսի սոցցանցային էջ ու սկսել գլխավոր նկարից կամ ասենք՝ կոնտակտներ ու ընկերության մասին նկարագրական ինֆորմացիա ավելացնելուց:
Էջում ամբողջական ինֆորմացիայի տեղադրումից հետո, դուք արդեն կարող եք հրապարակումներ, հետևապես նաև լիարժեք SMM իրականացնել:

smm