Նա հեռանում էր՝ առանց որևէ բան գնելու: Ո՞վ էր խորհրդավոր հաճախորդը: Մեկ տարուց ավելի օնլայն խանութները հենց այդ հարցի պատասխանն էին փորձում գտնել:

Ջոն Սմիթ անունով օգտատերը կայքում պատվերներ էր ձևակերպում, սակայն էջից դուրս էր գալիս՝ առանց գնում կատարելու: Պարզվեց, որ նա Google-ի բոթ էր: Այդ մասին հաղորդում է The Wall Street Journal-ը:

Վերջերս Ջոն Սմիթը զամբյուղում ավելացրել էր 20 ավտոարտադրանք, 10 ապրանք տան համար, $80-$500 արժողությամբ մանկական հավաքածուներ: «Երբ մոտ 48-ժամանոց զվարճանքն ավարտվեց, Ջոն Սմիթն արեց այն, ինչ միշտ է անում. նա հեռացավ՝ ոչինչ չգնելով»,- գրում է պարբերականը:

Սմիթն այցելում էր տարբեր օնլայն խանութներ՝ յուրաքանչյուր զամբյուղում թողնելով մեկ ապրանք: Նրա գործունեությունը խեղաթյուրում էր վիճակագրությունը, որն առցանց խանութներին անհրաժեշտ է գովազդի և բիզնես որոշումների ընդունման համար: Ջոն Սմիթն օգտագործում էր կեղծ էլեկտրոնային հասցեներ: Ոմանք նույնիսկ մտահոգված էին, որ նման ակտիվությունը մրցակցի կամ հաքերի ձեռքի գործն է:

Խորհրդավոր հաճախորդին բացահայտելու ընթացքում սլաքներն ուղղվեցին Google-ի կողմը. Սմիթը միշտ Gmail հասցեներ էր օգտագործում: Եվ երբ պարբերականը դիմեց Google-ին, հայտնի դարձավ, որ Ջոն Սմիթն իրենց ստեղծած բոթն էր: Իսկ նրան «աշխատեցնելու» նպատակը, ըստ ընկերության ներկայացուցչի, պարզելն էր՝ համապատասխանո՞ւմ են, արդյոք, օնլայն-խանութներում նշված գները Google Shopping-ում և գովազդային հայտարարություններում ներկայացվածներին:

Ընկերությունից նշում են՝ իրենք օգտագործում են ավտոմատացված համակարգեր՝ համոզվելու համար, որ սպառողները վաճառողներից ստանում են գների մասին ճշգրիտ տեղեկություն: