Ձեզ, հավանաբար, հաճախ են ասել, որ բիզնեսի համար պետք է ընտրել պրոֆեսիոնալ, պարզ, գեղեցիկ, հարմար, հաճախորդի աչքին հաճելի կայք: Իսկ ո՞րն է դա: Ոչ մեկ չի՞ ասում: Մենք էլ չենք ասի, բայց կօգնենք հասկանալ, թե ինչպես գտնել օպտիմալ տարբերակ և գոհանալ ու գոհացնել հաճախորդներին:

Բայց նախ այս հոդվածի գլխավոր ՀԱՐՑԸ.
-Ո՞ր տեսակի կայքն է բիզնեսի համար լավագույնը:
ՊԱՏԱՍԽԱՆԸ.
-Ներեցեք, իսկ ի՞նչ բիզնես ունեք դուք:

Սա ոչ թե ուրիշի եկամուտների մոտավոր հաշվարկի փորձ է, այլ օպտիմալ տարբերակ որոնելու ճանապարհին առաջացած ամենաառաջին հարցը: Լենդինգ էջ (Landing page), թե՞ սովորական կայք՝ խնդիրը բնավ էլ սա չէ, այլ այն, թե ինչ նպատակ է հետապնդում ձեր բիզնեսը և ինֆորմացիայի ինչպիսի փաթեթավորումն է առավել հարմար՝ այդ նպատակներն իրականություն դարձնելու համար:

Ի՞նչ է լենդինգ էջը

Landing page-ը մեկէջանոց «կայք» է`  կազմված ընկերության մարքեթինգային և թիրախային նպատակների իրականացման համար: Հայտնի է նաև այլ անվանումներով՝ լենդոս, հաճախորդների ներգրավման էջ, թիրախային էջ և այլն:

Landing page-երը մարքեթինգի կարևոր տարրերից են և շատ հարմար գործիք՝ ապրանք կամ ծառայություն վաճառելու համար: Արդյունավետ landing-էջը ինֆորմացնում է պոտենցիալ գնորդներին այնպես, որ երբեմն հասկանում ես՝ շտապել ես «պոտենցիալ» բառը գրելիս կամ ասելիս. նրանք արդեն գնորդ են:

Այստեղ օգտատերերը կարող են հայտնվել կոնտեքստային գովազդների շնորհիվ, բլոգների, բաններների, սոցցանցերի կամ էլ էլեկտրոնային նամակների միջոցով:

Ե՞րբ և ինչո՞ւ ընտրել բազմաէջ կայք, այլ ոչ թե լենդինգ էջ

Եթե բիզնեսն առաջարկում է ապրանքների կամ ծառայությունների լայն տեսականի կամ անհրաժեշտություն կա կայքում ներկայացնել «Պորտֆոլիո», «Մեր գործընկերները», «Կոնտակտներ», «Կարծիքներ» կամ «Սերտիֆիկատներ» բաժինները, էլ չենք խոսում ընկերության բլոգում պարբերաբար հետաքրքիր ու օգտակար հոդվածներ տեղադրելու մասին…Ուրեմն մեզնից լավ եք հասկանում, որ միայն լենդինգ էջով հարցը չեք լուծի:  Նման դեպքում կայք ունենալու տարբերակը շատ ավելի հարմար է, քանի որ ձեր ունեցած ինֆորմացիան հանգիստ կարելի է համակարգված տեղավորել համապատասխան բաժիններում: Այս պարագայում ձեզ «տարածություն» է պետք, իսկ լենդինգում այն չկա:

Իսկ ի՞նչ կա լենդինգ էջերում և ինչո՞ւ օգտագործել այն. Landing page-ի թրենդը՝ ձեր բրենդին

Լենդինգ էջերն առաջարկում են մեկ պրոդուկտ կամ ծառայություն՝ ուղղված կոնկրետ թիրախային լսարանին: Սովորական վեբ էջերից լենդինգ էջերը տարբերվում են մինիմալիստական դիզայնով և մինիմում տեքստով: Այստեղ չկան (չպետք է լինեն) շեղող բաններներ ու գովազդներ, քոփիրայթերի ճարտասանական տաղանդի մասին վկայող երկարաշունչ պարբերություններ: Դիզայնն ու բովանդակությունը միայն մեկ նպատակ ունեն՝ ակտիվ գործողության դրդել ապրանքը կամ ծառայությունը տեսնողին՝ զանգել, գրել, բաժանորդագրվել ու վերջապես՝ գնել:

Չնայած սրան՝ փորձագետները «վաճառող էջերին» քննադատաբար են մոտենում՝ մատնանշելով՝ աշխատանքային սխալները և նշելով, որ նմանատիպ էջերը կարող են հաջողություն բերել, միայն եթե ստեղծված են որակյալ տարբերակով:

Իսկ ո՞րն է որակյալ Landing page-ը

Մաքսիմալ կերպով նպատակը թիրախավորած Landing page-ն ավելի հեշտ կհասնի արդյունքի: Սա չի նշանակում, որ լենդինգը կարելի է ամբողջական կայքի ալտերնատիվ համարել. այն ոչ թե կայքի ալտերնատիվ է, այլ ավելի շուտ գովազդային «վեբ-ֆլայեր» կազմելու ձև: «Մեկ էջ, մեկ նպատակ» մոդելի հաջողված լինելն ապացուցում են հետազոտությունները:

Լենդինգ կայքերի քանակը, համաձայն վերջին երեք տարվա վիճակագրական տվյալների, աճել է 2-3 անգամ:

Լենդինգում բոլոր հարցերի պատասխանները պետք է տալ լակոնիզմով և շատ պարզ: Գնորդի մոտ ապրանքը չգնելու պատճառ թողնել չի կարելի, չէր խանգարի նաև նրանց աչքի առաջ պատվերի կոճակ կամ հեռախոսահամար էլ գրել:

Եթե պատվիրում եք լենդինգ էջ, իմացեք՝ կա լենդինգ և լենդինգի պարոդիա. կլասիկ լենդինգը համարյա այսպիսին է:

• Կարճ ու հասկանալի վերնագիր
• Ճշտող, բացատրող ենթավերնագիր
• Տեքստային լակոնիկ հաղորդագրություն, որից պոտենցիալ գնորդը կարող է ամբողջական ինֆորմացիա ստանալ ծառայության կամ ապրանքի մասին:
• Հետադարձ կապի հնարավորություն (պարբերաբար ցուցադրվող), որ կօգնի պոտենցիալ գնորդին՝ դառնալ իրական:
• Լրացուցիչ ինֆորմացիա՝ լուսանկարներ, վիդեո, սերտիֆիկատներ, եթե կարծում եք, որ դրանց կարիքն իրոք կա:

Սկզբունքներ, որոնք կօգնեն ունենալ լավ (կարդալ` վաճառող) լենդինգներ

• Պարզություն: Լենդինգում յուրաքանչյուր բառ նպատակ ունի՝ զանգը, բաժանորդագրվելը, հաղորդագրություն ուղարկելը, պատվիրել կոճակ սեղմելը: Դրա համար էլ այսպիսի էջերում կարող են խանգարել բաններները, լրացուցիչ հղումները և յուրաքանչյուր ինֆորմացիա, որ կարող է ծանրաբեռնել գնորդին ու «շեղել» նպատակային գործողությունից:
• Տրամաբանական հերթականություն: Կայքի այցելուն պետք է էջում առկա ինֆորմացիան ընկալի առանց բարդության, ամեն հաջորդ տող պետք է լրացնի նախորդին:
• Սպասելիքների արդարացում: Այո՛, ամեն հաջորդ տող պետք է շարունակի նախորդին և «կանխի» առաջարկվող ապրանքի կամ ծառայության մասին առաջացած հարցերը:
• Հավաստիություն: Վեբ-բանները կամ այլ գովազդը, որի միջոցով օգտատերը հայտնվել է ձեր էջում, պետք է համապատասխանի էջի բովանդակությանն ու ոճին: Եթե այցելուն «եկել է» կոնկրետ առաջարկի հետևից և առաջին հերթին տեսնում է ընկերության մասին երկարաշունչ նկարագրություն, դժվար թե երկար մնա ու դեռ ավելին՝ գնում անի:
  Կարելի է հրաժարվել շատ վառ նկարներից ու լենդինգը երգ-երաժշտությամբ ուղեկցելուց, անհաջող կամ երկար տեսանյութերից և այն ամենից, ինչը կարող է շեղել: Լենդինգում պետք է կենտրոնանալ, կենտրոնանալ նպատակային գործողության վրա:

  Ինչպե՞ս պլանավորել աշխատանքն ու ինչի՞ց սկսել

Առաջինն, ինչ պետք է իմանալ լենդինգ էջի մասին, թիրախային լսարանին ճանաչելն է: Որեղի՞ց են գալիս հետևողները, էջի այցելուները, գովազդային ինչպիսի՞ տարբերակի վրա են նրանք հիմնականում «շեղվում», ի՞նչ ինֆորմացիա են փնտրում. սրանք կարևոր հարցեր են, որոնց պետք է անդրադառնալ լենդինգ էջ պատրաստելիս:

Լենդինգ-էջի մշակման աշխատանքներն արժե պլանավորել, օրինակ՝ այսպես`

• Վեր հանել ընկերության (բրենդի, պրոդուկտի) ուժեղ կողմերը
• Բացահայտել մրցակիցների թույլ կողմերը
• Վերլուծել առաջարկվող ապրանքի/ծառայության մասին կարծիքները և արդեն առկա գովազդները
• Հաճախորդին լավագույն առաջարկ անելու տարբերակներ քննարկել
• Պատրաստել տեքստ՝ «ձգող» վերնագրով, ենթավերնագրով և լրացուցիչ ինֆորմացիայով
• Նախապատրաստել պրոտոտիպային էջ
• Պատրաստել դիզայն-մակետը
• Մշակել վեբ-էջը՝ համաձայն մակետի
• Թեսթավորում անցկացնել, օպտիմիզացնել և ուղղել սկզբնական փուլում առաջացած սխալները:

Շատ կարևոր է, որ Landing-էջը responsive լինի, այսինքն հարմարեցված լինի նաև պլանշետների և սմարթֆոնների էկրաններին, ինչպես նաև նույն տեսքն ունենա հիմնական վեբ-բրաուզերներով՝ Chrome, Firefox, Safari:

Հանկարծ ու կարծիք չստեղծվի, թե լենդինգը հրաշագործ էջ է: Ո՛չ այն այդպիսին չէ, բայց կարող է մոտենալ այդ ցուցանիշին, եթե էջի ստեղծման վրա, բացի տեխնիկական մասնագետից աշխատեն նաև՝ մարքեթոլոգ, քոփիրայթեր, վեբ դիզայներ, որոնողական մարքեթինգի (SEM) մասնագետ:

Առաջարկում ենք չփորձել լենդինգ էջերը SEO-ով առաջ մղել. սա անշնորհակալ գործ է, քանի որ որոնողական համակարգերը նախապատվությունը տալիս են բազմաէջ, ոչ թե մեկէջանոց կայքերին:

Ի դեպ, եթե ձեզ դուր է գալիս և՛ լենդինգ էջ և կայք ունենալու միտքը, շնորհավորում ենք. դուք միայնակ չեք: Իրականում այլ տարբերակ էլ կա՝ լինդոկայքերը: Իմաստը հետևյալն է՝ մեծ ընկերությունն ունի կայք, որի էջերից մեկը կամ մի քանիսը ստեղծված է լենդինգի սկզբունքով: Քիչ չի պատահում, որ լենդինգն այդ կայքի հենց առաջին էջն է: Լինդոկայքերի դեպքում կարելի է ձեր ընկերության բազմաէջ կայքում տեղավորել լենդինգը ու բարելավել կոնկրետ ապրանքի կամ ծառայության վաճառքների աճը:

Լենդինգ էջերի կամ կայքերի պատրաստման մասին կարող ենք ոչ միայն պատմել, այն նաև օգնել ձեզ՝ սեփականն ունենալու հարցում: Մեր կոնտակտներն էջի ամենաներքևում են: